政助陳凱欣fb筆戰陳沛然

【明報專訊】醫學界立法會議員陳沛然（Pierre）早幾日喺fb上載立法會開會時，質問食物及衛生局長高永文嘅片段，仲加多句「都是我的錯，問題太尖銳，要自我檢討，講完」。Pierre呢個帖文就惹嚟食衛局政治助理陳凱欣不滿，陳凱欣仲用私人fb帳戶同Pierre開火，二人火併幾個回合，仲有唔少Pierre嘅fb朋友加入戰團。今次真係一地花生殼。


Pierre早幾日喺立法會衛生事務委員會會議要求高永文交代《醫療人力規劃和專業發展策略檢討報告》嘅詳情，包括用咗幾多錢做報告、中大港大可以攞到幾多資助培訓醫生等，高局長話資訊問題可以喺會後提供。


陳凱欣就回應帖文，話Pierre「看事實一定要看全部，會議超過一小時，片段只有3分鐘，你喜歡怎樣形容也可以……利用別人不熟議會過程，只看3分鐘片段，就判斷高局長不回應，確實不太公允……踩低別人抬高自己，永遠最容易，不過，有需要嗎？如果高局長不能滿足你，那希望下任局長能令你滿足一點！」

之後陳凱欣仲質疑Pierre刪留言，但Pierre用fb紀錄截圖證明清白；又貼咗另外幾次會議高永文無答問題去反擊。


陳凱欣同Pierre火併幾個回合，Pierre打完場話「懇請各位朋友高抬貴手，認識陳凱欣幾年，工作認真，只是各為其主」，呼籲大家留意佢嘅新文章。