大連海事大學「育鯤輪」訪港 開放參觀慶回歸

【明報專訊】慶祝回歸活動不絕，嚟緊一艘專畀內地大連海事大學用嘅專用航海教學實習船「育鯤輪」亦會訪港7日，停泊喺海港城海運碼頭，其中3日會開放畀買咗飛嘅市民上船參觀。


公眾可以喺下星期五（30日）至下個月4日嘅指定時間，到海港城海運大廈三階買飛，票價10蚊，主辦機構會將收入捐畀香港公益金。持票人士可於下個月1日、2日同4日嘅指定時間上「育鯤輪」參觀，到時亦可參加維時30分鐘嘅普通話導賞團，了解吓艘船有幾犀利，同船員生活狀况。


「育鯤輪」係中國第一艘自行開發設計，亦係目前世上最先進嘅專用遠洋實習船，2008年投入使用。船上除咗有多媒體教室、圖書室、醫務室同健身房等設備，仲裝有雷達波浪測試儀、船舶姿態測試儀等先進儀器，可用於交通運輸工程、航海和輪機工程嘅實船測試同科學研究，每次航行可以畀196個學生喺船上面實習。