傳醫生任食衛局副局 業界估領袖

【明報專訊】政府新班子塵埃落定，下個焦點就係副局長人選，醫學界近排就玩估領袖，茶餘飯後討論邊個入熱廚房，做下屆副局長，事關有傳護士出身嘅候任食衛局長陳肇始有意搵醫生做副局長，點知傳吓傳吓，仲傳出個4人名單。


有醫生近排gossip邊個會做下屆食衛局副局長，傳聞嘅4個人物之中，Emily聽到當中3個名，包括喺立法會屢敗屢戰嘅精神科醫生黃以謙、幫林鄭月娥做競選辦副主任嘅骨科醫生潘德鄰，同埋自由黨嘅眼科醫生龐朝輝。Emily當然要向佢哋求證啦，潘德鄰話無人搵佢做副局，黃以謙就話「無嘢講」，龐朝輝就無回覆。據聞陳肇始搵嘅副局長係來自公立醫院，上面3位都係私人執業，似乎有啲出入。


除咗副局傳聞，另有醫生話聽聞行政會議都會有醫生，仲傳出係眼科醫生周伯展。周伯展就話無人搵佢喎。咁佢有無興趣做副局長先？點知周醫生話有人搵佢至會諗，免得咁早諗，會諗創個心。