民協「小編」第一身反駁批評　網民質疑係阿基

【明報專訊】民協前晚喺facebook公布元老馮檢基已經通過黨內初選，得到中委會確認後，就可以代表民協參與稍後舉行嘅立法會九龍西補選，呢個消息一出，大批網民去民協fb留言，唔少人鬧阿基「戀棧權位」。但更搞笑嘅事係民協fb「小編」快速現身反駁，仲用第一身「我」嚟回應，於是有人質問「小編」係咪阿基嚟㗎。Emily噚日問過阿基，佢始終唔肯講自己係咪嗰位「小編」。


面對網民猛烈批評阿基參選，民協fb「小編」反駁，但就無啦啦用第一身「我」嚟回應：「我戀棧權位，12年不會中委會通過我在九西選（8成當選），我却堅持選超級。16年也不返回九西！」有網民即刻回覆問「小編」係咪阿基，仲有人話「民協真係一人黨，馮檢基連page都要自己覆」。


阿基稱會有「書面說明」

Emily問過阿基，佢始終唔肯講自己係咪嗰位「小編」，只重申民協會就呢單事件有個「書面說明」，但喺Emily要交稿時就仲未見到「書面說明」。面對唔少網民留言批評，阿基就話，喺當今政治如此分裂嘅時候，每個政治人物都要面對「左中右、前前後後」嘅意見，只要「唔係粗口，鬧人三代」，就「有則改之，無則加勉」。