邵家輝無諗過退出自由黨

【明報專訊】Emily噚日提過，立法會人力事務委員會開會討論標準工時，早已退出咗新民黨嘅田北辰提出將「合約工時」嘅工資線水平提升，由政府提出嘅1.1萬元增至1.6萬元，但最終只得佢自己一票贊成下被否決，當時自由黨邵家輝提出係咪支持就要問過黨友意見，於是田二少公開勸邵家輝退黨，學佢咁做獨立議員。邵家輝噚日就同Emily表明自己唔會退出自由黨，相信田二少都係講吓笑咁話。


邵家輝同Emily重申，「合約工時」係咪定喺1.1萬元，大家可以商量，亦有討論空間，佢係咪支持調高要再問問業界同黨友，佢表明從來無諗過退出自由黨，強調合約工時係自由黨立法會議員上屆提出嘅，所以個人絕對支持，但究竟工資線點訂，係太高、太低定合適，佢都願意同社會一齊探討。