何君堯重提周浩鼎風波 Paul：用常識都唔想再提

【明報專訊】立法會調查UGL事件委員會噚日開會，一如以往火花四濺，主席謝偉俊（Paul）更向同屬建制派嘅何君堯發炮，事緣何君堯重提民建聯周浩鼎畀特首梁振英修改文件風波，質疑早前閉門會議內容外泄嘅問題被「輕輕帶過」，但阿Paul回應時毫不客氣，話「希望你明白，用common sense（常識），我都唔希望你將周浩鼎件事挖出嚟講，對我哋建制派無乜好處」。


「遠超泄密咁簡單」

何君堯會上提到，雖然周浩鼎唔應該畀梁振英改文件，但規矩無明確規定受查人唔可以同咩人傾，相反早前閉門會議明確規定要守秘密，質疑點解周浩鼎事件要「置諸死地」，但泄密問題就可以輕輕帶過。阿Paul就話，周浩鼎做嘅事「遠遠超過泄密咁簡單」，所以自己早前都特別以閉門會議處理，但泄密問題就唔需要呢個做法。


何君堯另外要求所有出席會議嘅委員簽署法定聲明，表明過去無泄密，並協助調查泄密問題。經過修訂，委員會最終通過無約束力動議，要求委員簽署法定保密聲明，但立法會法律顧問強調動議無約束力，議員可自行決定簽唔簽。