20高手齊腳 電競節下周一賣飛

【明報專訊】電子競技喺全球大熱，旅發局今年8月4日至6日首次喺中環新海濱舉辦「電競音樂節」，20名選手終於齊腳，除咗內地、歐洲、港台澳，最新連北美選手都答應參加「英雄聯盟王者回歸世界邀請賽」，全部選手都係「英雄聯盟」（League of Legends，簡稱LoL）職業聯賽戰隊前成員，真係猛將如雲。


北美隊陣容噚日終於曝光，分別有HotshotGG（圖）、Chaox、TheOddOne、Chauster同LiNk，佢哋過往喺國際賽事都戰績輝煌，贏過唔少冠軍。邀請賽四強賽同決賽分別會喺8月4日同6日上演，冠軍隊將會贏取30萬元獎金。賽事門票下星期一（26日）早上10點起喺快達票公開發售，票價分別係480、280及150元。