蔣麗芸話尹兆堅劉國勳圓碌碌撞樣

【明報專訊】近年立法會地區直選，部分選區參選人眾多，選票愈來愈長，選管會早前就提出唔同建議，包括刪減選票上候選人嘅相或黨徽等；噚日立法會政制事務委員會就討論選票設計問題，唔少議員都對呢個建議有保留，仲提出唔同例子證明，唔印清楚相同黨徽等會令選民混淆，包括參選人撞名、似樣。


選票擬刪相刪黨徽 議員有保留

民建聯劉國勳表明反對政府建議，話選民除咗記得名外，真係會記住政黨同個樣去投票。佢提到舊年立法會選舉中，勞工界有何啟明（工聯會），超級區議會亦有何啟明（民協），如果兩個人喺同一選區參選，有可能令選民投錯票。


民建聯蔣麗芸就話，唔少候選人連樣都相似，好似民主黨尹兆堅同佢黨友劉國勳都好似樣，兩個都肥肥哋、圓碌碌；女候選人亦可以化妝、P圖，直言「選民都有年紀大、老眼昏花咁點算呢？」。泛民嘅毛孟靜亦同意，有候選人P圖P到唔同晒，又或者化妝化到結婚咁，同真人有好大分別。


政制及內地事務局副秘書長羅淑佩強調，政府對選票設計持開放態度，參考外國例子，選票亦有印政黨名，但無相等，佢話會研究喺投票間圖文並茂向選民提供資訊，亦希望喺黨徽同候選人名字唔縮細下，喺選票放到最多候選人。