加入教大校董會有因 感謝兩恩師 馬時亨由「擔梯」變入港大

【明報專訊】馬時亨百足咁多爪，除咗係港鐵主席，近排仲成為咗教育大學校董會主席，噚日佢就同Emily講，因為中學時期都遇到改變一生嘅好老師，令佢非常尊重老師，所以願意加入教大。
險踢出校 老師邀到家溫書
馬時亨話，佢細個時讀書好差，科科都「擔梯（H）」，中三時仲差到只可以試升中四，如果成績都係咁差嘅話，就會被學校踢出校。佢話，就喺試升中四時遇到兩個好老師，經常鼓勵佢，仲邀請佢到自己屋企溫書，令佢嘅成績於不足一年之間突飛猛進，仲喺英文科同生物科得到全級第一(口添)，從此佢就更加發憤讀書，入咗當時好難入嘅香港大學，主修經濟同歷史。馬時亨話好彩當初遇到呢兩位老師，「今日先有機會坐喺度，否則唔知做緊乜」。馬時亨又話，成為老師嘅人一定要有「心」，絕對唔可以只係為咗錢，而係為咗教學生嗰種滿足感。