笑茶記變水舞間 陳學鋒捱轟

【明報專訊】颱風苗柏襲港，為香港帶來好多雨水，仲令唔少地方水浸，而民建聯中西區區議員陳學鋒就因為呢場雨，喺網上惹來少少「關公災難」。話說佢噚日落區食早餐時，見間茶餐廳水浸入舖，就喺facebook上載相片分享，仲問大家「點樣係（喺）水舞間食早餐而又不失霸氣？」並加個戴住太陽眼鏡嘅emoji公仔，點知激嬲一啲網民，仲大派「嬲嬲」畀佢，有網民留言話﹕「人哋間舖搞成咁，好好笑咩？」有人就話佢咁樣係幸災樂禍囉。


被批幸災樂禍 陳：入去了解水浸

Emily噚晚打畀陳學鋒了解，佢話平日喺facebook都會分享一下日常生活，佢又話同呢間喺中環卑路乍街嘅茶餐廳識咗十幾年，都好熟吓，噚日見佢水浸入舖，都有入去了解情况，亦有喺嗰度食早餐，話咁做係支持間茶餐廳嘅表現。陳學鋒話都有見到網民嘅意見，但就唔回應咁多喇，最緊要搞好區內去水問題。