鼠戰中環10月再臨 障礙賽全新設計

【明報專訊】大家仲記唔記得民主黨涂謹申、公民黨楊岳橋、資訊科技界莫乃光同自由黨邵家輝，舊年戴住爆炸頭假髮、著住格仔恤衫扮工聯會王國興嘅look，喺中環跑步嘅畫面呢？每年一度嘅「鼠戰中環」慈善活動又嚟喇！今年將會於10月15日（星期日）喺遮打道舉行，到時一眾打工仔又可以好似佢哋咁，穿上創意服飾，以接力方式穿梭中環核心商業區玩障礙賽，一齊鬥智鬥力！

「鼠戰中環2017」踏入第12年，今年會有全新設計嘅障礙項目考驗參賽者，而今年嘅參賽隊伍需由8名隊員組成，並籌集最少6萬港元捐款，其中「鼠王爭霸戰」嘅每個高級行政人員，就要捐最少2萬元；5至10歲嘅小朋友都可以參加「未來鼠王戰」，參賽者要籌集最少1000元。參賽隊伍有限，以先到先得方式報名，截止報名日期為9月15日，有興趣嘅市民留意喇。