誠哥投資「走動式VR」 港人可試玩

【明報專訊】玩過虛擬實境（VR）嘅人可能都有體會，雖然個畫面好真實，但人基本上淨係可以企喺原地，唔可以走來走去，不過家就有公司要解決呢個問題。長和（0001）主席李嘉誠旗下嘅維港投資噚日就宣布，以領投人身分投資咗一個開發「走動式VR」嘅公司，種子輪融資600萬美金（約4680萬港元），而港人喺今個月尾仲有機會搶先試玩(口添)！
呢間叫做Nomadic嘅美國公司，係一間專注於「沉浸式娛樂」，同埋倡導實物觸控式VR體驗嘅公司，佢哋通過融合佈景設計同實物道具等，打造出一個多元化嘅場地平台，令玩家可以喺一個空間內自由活動，仲會同現實世界保持互動。
黃埔免費展出 明年正式推出
雖然Nomadic計劃出年首季先會正式推出VR裝置，但就會從今個月29號起，喺黃埔新天地時尚坊免費展出，咁得意嘅嘢小琴一定要去體驗下啦！
email: piano@mingpao.com
[小琴密語]