何藩《念香港人的舊》面世

【明報專訊】上年6月逝世嘅著名攝影大師何藩（圓圖，藍蓮畫廊提供）臨終前準備緊一本攝影集，但係搞咗一半就因為肺炎入院，未嚟得切整好本書就走咗。何藩離世就嚟一年，喺佢嘅屋企人協助下，《念香港人的舊》呢本書終於面世。


臨終前仍討論封面相

被譽為紀實攝影界「一代宗師」嘅何藩，離世前已為攝影集選出500張相，同埋諗好咗英文書名Portrait of Hong Kong，臨終嗰日佢仍在討論封面相，最終由其家人再篩選出153張相，相集文字就係喺佢留低嘅筆記，同埋舊文集裏面揀出嚟。何藩個女仲話，因為咁而令佢更加認識爸爸藝術家嘅一面。


《念香港人的舊》全部都係上世紀50、60年代香港嘅人物景像，Emily欣賞呢啲黑白相時，好似返咗去舊香港咁。呢百幾張相以前從來冇發表過，何藩嘅獨家代理人Sarah Greene話，何藩本身好鍾意呢一批相，不過嗰個年代嘅沙龍對呢批相冇興趣，所以一路都冇出到。


蘇富比搞展售會

呢本攝影集噚日面世，喺今個月30日前，香港蘇富比藝術空間搞咗個「何藩：鏡頭細訴香港光影」展售會，展出超過30幅何藩嘅手洗攝影原作。