內部初選揮低葉傲冬 民記派鄭泳舜戰九西補選

【明報專訊】青年新政游蕙禎、梁頌恆嘅九龍西及新界東議席補選料最快明年初舉行，各政黨早已摩拳擦掌準備，第一大黨民建聯更早於3月特首選舉期間舉行咗內部初選。而最有睇頭嘅就係九龍西議席，油尖旺區議會主席葉傲冬和深水埗區議員鄭泳舜（圖）都係大熱人選，唔少民記黨友都估計兩人票數不相伯仲。


3月初選 票數保密至昨日

其實民記內部早已開票，不過因為只有極少數領導層掌握最終票數，包括前主席譚耀宗同主席李慧琼，保密工夫認真係「滴水不漏」，搞到大家都望眼欲穿。不過Emily聽聞，民記常委會噚日開會就正式公布結果，由鄭泳舜跑出，預料將代表民記披甲出戰九西，相信民記稍後都會與其他建制政黨、區內兄弟姊妹開始籌備選舉工作。


保良局前主席之子

論背景同實力，葉傲冬同鄭泳舜其實都難分高下，葉傲冬係民建聯元老葉國謙之侄，根正苗紅，而大一歲嘅鄭泳舜則係保良局前主席鄭錦鐘嘅公子，浸過鹹水，形象專業。今次內部遴選鬥到難分難解，但隨住結果揭曉，相信雙方都要啲時間消化，再齊心為民記喺九西力爭一席。