司機疲勞檢測App 自動叫醒合眼者

【明報專訊】交通意外時有發生，曾經有司機懷疑因為太攰而發生車禍，浸大學者研發咗個駕駛人士疲勞檢測及警告系統App，下載兼啟動程式後，只要開車時擺個智能電話喺前面，個前置鏡頭就可以偵測駕駛者嘅疲勞狀態，例如對眼如果慢慢合上，系統就會發出聲響提醒司機，準確度仲達85%。


家市面都有類似嘅疲勞預警系統，不過淨係得豪華品牌車上有安裝，仲要額外配置感應器同監測裝置，除咗貴，更新系統都唔係咁易。研發呢個應用程式嘅浸會大學計算機科學系教授張曉明話，團隊用咗3年時間，終於整到呢個簡單易用嘅應用程式。用家只要喺揸車時開App，佢就會自動偵測到駕駛者雙眼開合係咪收窄、頭部有無向前傾等情况，系統會自動響起警報，叫醒駕駛者。系統需要聲控或輕觸個熒幕先可以解除警號，確保司機唔會一直瞓落去。


奪國際發明獎 申請緊美國專利

呢個系統耗電量同睇短片差唔多，仲可以同時用後鏡頭當行車紀錄儀用。個App仲揚威國際，今年4月喺第45屆日內瓦國際發明展拎到電腦科學組別優異金獎，並申請緊美國專利。張曉明話個系統特別適合要長時間揸車嘅司機，如果日後推出市面會考慮收費，不過一定唔貴，一般司機都負擔到，現時本地已經有間擁有百幾架大型車嘅公司同佢哋洽商緊。