袁彌昌幫新民黨 盼轉型中間路線

【明報專訊】曾俊華嘅特首選舉工作贏到口碑，而同樣參選嘅新民黨葉劉淑儀就賞識幫曾俊華寫政綱嘅袁彌昌（Derek），挖咗Derek去新民黨做政策總裁，噚日正式返工。Derek同Emily講，今次雖然轉咗去葉太呢條跑道，但唔係想自己起飛升官或參選，而係想協助新民黨轉型，將阿sir曾俊華走中間路線嘅經驗帶去新民黨。


幫過曾俊華寫競選政綱

Derek擁有優秀學歷背景，英國雷丁大學戰略研究博士，啱晒葉太酷愛名校精英嗰杯茶！Derek話特首選舉過後，葉太都想新民黨做啲改變，Derek自己都好想做吓實驗，協助革新新民黨。Derek話阿sir提倡嘅中間路線，當時只能接連到民主派，未能駁通建制派，如果新民黨能夠走到中間路線，倡議爭取到市民支持，唔係只做保皇黨，咁都應該有市場。


Derek話未來幾年仲會有幾場選舉，所以想選舉前協助重建新民黨形象，至於佢嘅工作有無包括幫葉太5年後再戰呢，Derek就話太長遠未去處理。Derek話葉太畀佢幾大自由度，而佢新學年仲可以去大學兼教課程。葉太就話歡迎Derek加入，大讚Derek學歷勁，有國際視野，希望佢嘅加盟能夠為新民黨嘅政策研究工作注入年輕、獨立嘅新思維。