話英超賽門券好賣證港足多擁躉 體育專員楊德強被學者反駁

【明報專訊】本地老牌球會南華早前主動申請從港超聯降級甲組，轟動球壇，政府體育專員楊德強噚日出席港台節目《城市論壇》時，話明白球迷失望，但認為港超聯過去一年整體嚟講有進步，有港超球隊躋身亞冠盃小組賽，喺香港舉行嘅幾場亞冠盃入座率理想，又形容英超球隊熱刺來港表演賽同英超挑戰盃等門票銷情好，證明香港仲有足球捧場客咁話。


指兩種商品 難相提並論

不過，楊德強呢番話即場被學者反駁，因為英超球隊表演賽收益理想，唔代表本地球壇有進步。理大專上學院人文、設計及社會科學學部講師李峻嶸話，唔同意楊德強嘅說法，認為本地球賽同英超球隊來港屬於兩種商品，唔可以相提並論，佢又質疑政府有無將扶持本地職業球賽，視為政策重要一部分。


體育、演藝、文化及出版界立法會議員馬逢國認為，南華退出對港超聯或多或少有影響，但佢期望南華能夠投放資源喺青訓，畀多啲機會本地青年球員。足總董事梁芷珊形容南華退出對港超聯係重大打擊，希望南華未來可以認真投資喺青訓。