籲關注難民 3D藝術大師作品首展出

【明報專訊】全球各地難民因為戰亂、政治迫害、宗教等原因，被迫離開家園，例如敘利亞內戰已經持續6年，去到舊年底，敘利亞有超過30萬人因為內戰死亡，660萬人被迫離鄉別井。為咗令更多人關注敘利亞人嘅狀况，美國3D藝術大師Joe & Max創作「With Syria」（中譯「與敘利亞同行），呈現阿勒頗受戰火摧殘嘅景象，舊年曾經喺位於紐約嘅聯合國總部展出。


國際特赦組織香港分會同關注弱勢社群健康權益嘅組織「醫護行者」合作，成功爭取喺香港展出作品，今日喺尖沙嘴文化中心對出空地展出，聽日移師到銅鑼灣時代廣場地下，市民可以免費參觀。另外，今日晏晝1點喺展覽場地會舉行交流會，有希望推廣人權議題嘅本地大學生，將會同正尋求庇護嘅年輕人對談，希望向公眾推廣更多有關難民及戰爭嘅信息。