勵駿非洲開完賭場開銀行

【明報專訊】周錦輝做主席嘅勵駿創建（1680），近年做咗非洲佛得角大財主，早排用2.5億美金籌建連賭場嘅綜合度假村之外，最近又有新猷。佢旗下嘅勵駿環球投資，今次準備喺佛得角開銀行，打算命名為Banco Sino-Alantic（中國大西洋銀行）。佢同佛得角政府簽署咗備忘錄，有6個月時間搞申請。


賭王都喺當地開銀行

其實周錦輝安排勵駿創建上市後，已經動作多多，由澳門開始發展，家足迹遍佈老撾、葡萄牙同佛得角。今次佢搞埋銀行做Banker，原來係因為「央企支持澳門中葡平台建設高峰會」7個項目內其中一項，一如佢之前講，希望可以喺佛得角作為開端，迎接一帶一路商機。唔知佢今次去佛得角開銀行係唔係同呢樣嘢有關呢？喺佢之前，賭王何鴻燊旗下GeoCapital亦喺佛得角開銀行，睇來佛得角嘅銀行生意幾旺場有得做喎。


[小琴密語]