尹兆堅48歲生日 願望想減肥成功

【明報專訊】民主黨立法會議員尹兆堅噚日生日，但就要喺立法會辯論特首梁振英嘅彈劾議案中度過，阿尹話如果唔係老婆講一句「生日快樂」，佢就忙到連生日都唔記得，至於有咩生日願望，阿尹笑住話「老婆今個月唔拎家用囉」。不過，阿尹一秒後即刻改口，話只係講笑，強調「老婆陪住呢，就係最好嘅生日禮物」。
稱老婆講生日快樂先醒起
尹兆堅昔日被叫做「乳鴿」，但原來已經48歲喇，大家應該改口叫佢「中鴿」，佢話呢幾年嘅生日都喺工作中度過，只可以「求其慶祝」，噚日撞正彈劾議案，更加無慶祝活動，只係返屋企同老婆食飯。阿尹話，真正嘅生日願望係想減肥成功，話自己家比大學時足足重咗55磅呀。