蔣麗芸再倡流浪貓滅鼠隊 葉劉：治鼠要請教「鼠王芬」

【明報專訊】香港鼠患指數近年呈升勢，立法會噚日舉行大會會議，曾建議訓練流浪貓捉老鼠嘅民建聯議員蔣麗芸提口頭質詢，建議政府仿效英美等國家，組織流浪貓成為「社區貓隻滅鼠隊」，以解決鼠患問題。蔣麗芸話最近收到多名九龍西居民投訴，話晚間街市鼠患特別嚴重，啲老鼠跑晒出嚟「開party」，指當局放老鼠藥、老鼠膠、老鼠籠等做法都無效。
促邀內地專家 梁美芬：訓練人更有效
新民黨議員葉劉淑儀就話，滅鼠人員需要有專業知識，如果唔係會好似康文署亂咁剪樹，令幼鳥墮地死亡，建議食衛局長高永文請教「鼠王芬妹妹」，邀請廣州嘅滅鼠專家來港。
經民聯議員梁美芬就話希望18區都有鼠王，但佢批評政府喺治鼠方法太落後，又話近年大型鐵路工程如沙中線，將啲老鼠震晒出嚟，要求政府與內地專家拍住上，逐個區做，與其訓練貓捉老鼠，不如訓練人治鼠更好。
高永文話，培訓流浪貓嘅做法需要驗證，並會諮詢唔同持份者，又指相關建議喺外國「聲稱」可行，但喺香港「仍然有待驗證」。佢又話，政府於2016/17年度已發放6300萬元推行地區主導行動計劃，42個項目中有11個為加強地區清潔。
正如高永文話，貓識捉老鼠係常識，但要組織流浪貓捉老鼠就要驗證。現時歐美有愛護動物組織以絕育貓捕鼠，例如美國Tree House Humane Society現時約有3600隻已絕育嘅流浪貓協助捕鼠，聲稱取得成效。