羅致光拎港大「老人牌」﹕總有退休一日

【明報專訊】香港大學噚日舉行長期服務獎頒獎典禮，有成近300名教職員工作咗最少15年，其中喺港大社會工作及社會行政學系做副教授，近排盛傳係下屆政府勞工及福利局長熱門人選嘅羅致光，原來喺港大教咗35年，Emily當然第一時間恭喜佢。
羅致光話自己1981年正式入港大工作，好開心可以教書，同時又可以參與社會事務。佢話學生好鍾意聽佢講故仔，同埋分享一啲「秘密」，不過唔講得畀Emily知！
認對福利勞工有好多睇法
如果日後有新發展，會唔會更加忙，唔再喺港大做？羅致光話大學工作本身都好忙，但佢覺得「唔係工作位置問題，而係個人取態」 。佢話喺一個地方工作咁耐，「總有退休一日」。佢又話自己喺福利、勞工同人口政策上有好多睇法，不過覺得回歸咗咁多年，因為種種原因，政策發展有啲慢。