紀律部隊民望消防最高 警隊又包尾

【明報專訊】紀律部隊嘅工作同市民息息相關，港大民意研究計劃噚日公布紀律部隊滿意程度調查結果，其中消防處民望最高，評分有成84.2分，創咗紀錄以嚟嘅新高；而警隊繼續排包尾，只有64.1分，滿意率淨值（即滿意率減不滿意率）35百分點。


民研計劃喺5月底，用隨機抽樣方式做調查，Emily仔細睇過啲數字，發現整體排名同上次調查結果嘅差別唔大。民望方面，消防處繼續排名第一，政府飛行服務隊同埋醫療輔助隊分別排第二、第三，分別有79.5分同78.9分，叮噹馬頭，其後依評分排名就到海關、民安隊、入境處、懲教署、廉政公署；警務處排包尾。警隊喺佔領行動以嚟，排名一直包尾，唔見有起色，睇嚟警隊要加把勁，增加市民支持度，咁日常執勤工作先可以得心應手。


至於有幾多人認識紀律部隊？結果顯示，消防處、警務處和入境事務處認知度超過95%，就算最低嘅民安隊都有近八成，反映市民同Emily一樣，都算認識香港各個紀律部隊。