超人慶回歸 長實5酒店半價

【明報專訊】香港回歸20周年，長和系主席李嘉誠這位愛國商人當然也想「齊歡暢，同慶賀」，旗下長實地產（1113）內地五間酒店為慶祝回歸，特別為持有回鄉證嘅香港市民提供住宿半價優惠！呢5間酒店包括北京東方君悅大酒店、北京喜來登長城飯店、重慶海逸酒店、成都天府麗都喜來登飯店及瀋陽麗都索菲特酒店。半價優惠期由今年7月1日起至12月31日。


揸回鄉證才可享用

以7月1號房價計，成都天府麗都喜來登飯店每晚最平都只係需要613港紙，咁半價左之後都只需約300港紙！

長實今次仲好細心，連旅費都幫你計到盡。例如，若果你去北京住佢嘅酒店，慳咗嘅一半酒店錢就可以用嚟去埋瀋陽玩，入住同樣有半價優惠嘅瀋陽酒店，享受雙重優惠咁話！成都同重慶嘅酒店都係咁玩法，搭高鐵就好快去到。今次最正嘅係，呢個半價優惠唔只得標準客房，連套房以至總統套房都啱用，所以如果你係度蜜月、慶祝周年紀念都一樣啱使。長實仲話，回鄉證係中央政府給香港市民嘅身分象徵，香港市民可享出入中國內地嘅方便。今次特別優惠目的其實係想標榜回鄉證嘅身分象徵意義喎！


[小琴密語]