積壓大量撥款申請 倡財會加會 波哥話泛民大多無覆

【明報專訊】今個立法年度7月結束，但財委會積壓大量撥款申請排隊。立法會主席梁君彥提出構想，話借出周四大會時間開財會，但民主派議員噚日就出聲明，批評梁主席要削減大會嘅會議時間，配合與行政機關合作，係削弱立法會嘅議事職能。不過，財委會主席陳健波就吐苦水，佢早就提出喺其他日子加開財會，叫議員回覆，但波哥話泛民20幾人，只有幾個人肯覆佢，其餘一係唔覆，一係喺佢建議日子上全部打「x」，波哥反問泛民究竟想點。


加會後有20小時

波哥話，財會正常喺周五下晝開，但6月30日近七一回歸開唔到會，只剩9號、16號及23號3日共12小時會議時間，故佢提出加會；而既然泛民唔多理佢，佢數夠建制派就加會，決定喺23號上午及17號周六上午開會，合共加8個小時，換言之，6月份暫時有20個小時會議。


不過，波哥始終唔樂觀，因為嚟緊要審議較有爭議嘅啟德體育園319億元撥款，如果有議員又提出休會、提修訂，一個項目已可以搞20小時。波哥懇請泛民高枱貴手，唔覆佢開唔開會無問題，期望到開會時就善用時間，向官員提出問題，唔好刻意打斷或拖延會議。


立法會主席梁君彥就話，佢提出大會時間讓路財會開會，乃初步構思，會聽議員意見同作整體考慮後決定。