會展幕牆安排未搞掂 回歸煙花記招突取消

【明報專訊】今年係回歸20周年，7月1日維港上空安排盛大嘅煙花匯演，主辦單位原定噚日下晝3點開記者會，介紹今年煙花特色，但開前無耐突然通知要取消記者會，唔通煙花匯演有變卦？Emily去打探，原來匯演會涉灣仔會展中心，而煙花主辦單位就話，家佢哋遇到一啲保安問題未解決。會展喺七一會有中央領導人前赴主持新一屆特區政府官員就職禮。


保安問題待解決

Emily都好期待20周年煙花有新意，諗唔到記者會臨時取消。負責記者會嘅公關就話，因為今年煙花會新增多媒體元素，計劃喺會展嘅玻璃幕牆上安裝LED熒幕配合煙花表演，但因為技術上未搞掂，所以未公布得住，但佢就無講遇到乜嘢技術問題。


負責人承諾一切順利

負責工程嘅港星煙火製作公司負責人毛偉誠就話，煙花燃放方面完全無問題，只係差會展幕牆上嘅工作未搞好。佢話工程審批、會展附近嘅保安等問題都未處理好，加上幕牆上顯示嘅用字同圖像都未有定案，所以記者會要取消，希望準備好一切先畀大家睇。


離七一唔夠一個月都仲未準備好，但毛偉誠就拍晒心口話，23分鐘嘅煙花匯演到時一定可以順利舉行。不過，公關公司仲未答到記者會會延遲到幾時。