小股東轟新昌沒派紅股

【明報專訊】作為一間已經有接近80年歷史嘅香港企業，勢估唔到新昌（0404）可能「晚節不保」，公司最近陷入資不抵債危機，噚日開股東會更加畀小股東連環炮轟。首先管理層被質疑冇兌現承諾，明明去年話10送1紅股，但家就以「技術問題」取消，最慘係在場有部分小股東就係諗住有紅股派先買新昌股票，點知家中晒伏。


管理層拒答大股東會否回購項目

另一方面亦都有小股東問公司有冇考慮搵大股東兼非執行主席林卓延幫手，回購番佢賣畀公司嘅內地地產項目，等公司可以渡過難關，但就畀管理層以林卓延冇出席股東會無法代答為由，拒絕回答小股東提問。


事後有位新昌股民同小琴講，佢家揸住成10幾萬股，仲係1蚊以上時買入，原本覺得當年鉛水事件只有新昌冇事，覺得佢係良心公司，點知換咗內地商人林卓延做主席就立即出事。呢位股民仲話，證監會同港交所應介入調查新昌係咪違規，最好盡快凍結資產，保障小股東僅餘利益。


[小琴密語]