王迪詩：站珠寶店櫥窗外遭喝斥店方：深感抱歉

【明報專訊】作家王迪詩喺facebook發帖，講番之前喺中環一間商場嘅珠寶店門外遇到無禮對待，佢話企喺店外面回覆短訊，畀店員話佢「遮住櫥窗」，仲叫佢走開，網民對呢件事熱烈討論；王迪詩就同Emily講，佢都對件事感到震驚，仲話人皆平等，「人係以品格劃分，唔係靠名牌劃分」，而涉事珠寶店Rocas Jewellery負責人就回覆話，同王小姐有誤會，深感抱歉，會跟進事件。
王迪詩噚日同Emily講番當日傍晚約6點，喺中環太子大廈商場行經一間珠寶店，接到一個重要信息，又唔想企喺路中間阻住人，就企埋一邊回覆，估唔到引嚟女店員不禮貌嘅態度同眼光。王迪詩話，唔排除當時因為身穿牛仔褸同平底鞋，全身又無一件名牌，令對方覺得自己無能力消費。
呢個帖文一出，網民即刻熱烈討論同分享，唔少人留言話有類似經歷或有同感，令王迪詩忍唔住諗到過去10幾年因內地自由行旅客湧港消費，令唔少民生小店被淘汰嘅情况。佢話希望呢個係一個契機，等商人再次重視本土顧客，「內地客或突然消費好高，但佢哋係較唔穩定，只有生活喺呢度嘅人，不論經濟好壞都要消費，留住本土客先可以穩住生意」。