樹仁創校45周年 胡鴻烈獲頒終身成就獎

【明報專訊】樹仁大學係香港第一間私立大學，創校至今已經45周年。樹仁大學噚日舉行45周年校慶酒會暨研究院綜合大樓開幕典禮，請咗政務司長張建宗擔任典禮嘅主禮嘉賓。張建宗亦代表樹仁大學校董會向創辦人胡鴻烈校監頒授「終身成就獎」，感謝佢過去多年為樹仁發展盡心盡力，作育英才。
張建宗致辭嗰陣好識做，大讚樹仁，話噚日係三喜臨門大日子，第一喜係慶45周年；第二喜係綜合大樓落成；第三喜梗係胡鴻烈攞到「終身成就獎」。
張建宗：難忘兩老為樹仁抵押物業
張建宗話，佢早年做教育統籌局副局長，已經同胡鴻烈以及已故嘅鍾期榮校長建立好深嘅感情，佢話印象最深係胡鴻烈同鍾期榮兩老將自己嘅物業抵押嚟支援學校興建同運作，無私奉獻，極之偉大，攞到「終身成就獎」係實至名歸。
至於新落成嘅研究院綜合大樓，採用雙幢式設計，由高低兩座同裙樓組成，提供500個宿位，同埋演講廳、自修室、咖啡座等新設施。