CY最後答問會 司局長欠2 吳克儉訪京 楊偉雄去高峰會

【明報專訊】特首梁振英（CY）噚日喺立法會出席任內最後一次答問大會，3司13局首長幾乎齊腳，但就唔見教育局長吳克儉同創科局長楊偉雄，點解呢？原來成日被人話頻繁外訪嘅吳局長咁啱又去咗外地訪問，而楊偉雄就去咗理工大學參加高峰會而出席唔到答問大會。


答問大會9點半開始，官員席上，頭排3個司長政務司長張建宗、律政司長袁國強同財政司長陳茂波排排坐，第二排就係各局長嘅座席，零零舍舍有個位空咗，Emily數數人頭，就發現少咗吳克儉同楊偉雄，而副教育局長楊潤雄署任吳克儉個位，坐咗喺局長席。


吳局長去咗邊呢？原來同8間大學高層去北京交流，前晚先喺facebook發帖，介紹佢哋一行人同北京市教育委員會劉宇輝主任會面，就高等教育交換意見。至於創新及科技局長楊偉雄就出席理大Hotel ICON舉行嘅《泰晤士高等教育》創新與影響高峰會，去唔到答問會。雖然局長唔齊人，但副局長同政治助理就好捧場，好多都嚟咗立法會旁聽CY最後一次答問大會，非常熱鬧。