畀蛋撻「考起」 容海恩：牛油皮同酥皮係咪一樣？

【明報專訊】你鍾意食牛油皮定酥皮蛋撻呢？立法會議員容海恩（Eunice）就答你唔到，並反問：「牛油皮同酥皮係咪一樣？」講緊嘅係香港青少年領袖發展協會「香港模擬立法會」嘅宣傳片，佢哋搵嚟多個立法會議員拍片，其中Emily覺得Eunice答唔出自己鍾意食牛油皮定酥皮蛋撻一段最爆笑，佢仲笑笑口問主持人牛油皮「係用牛油搭出嚟？」網民睇完都畀「哈哈笑」，仲叫大會唔好問啲咁難嘅問題啦。


「模擬立法會」踏入第10屆

香港青少年領袖發展協會籌辦咗多年嘅「香港模擬立法會」，今年嚟到第10屆，搵咗多名議員拍片宣傳，片中主持人會問選擇題同IQ題。除咗問食蛋撻，又問Eunice如果世界末日，最想同邊個喺立法會過，佢笑晒咁答係新民黨主席葉劉淑儀，Emily睇片時，見到Eunice有時笑到身都震埋，應該都玩得幾開心。


陳淑莊：世界末日唔想喺立會過

同一條問題，公民黨陳淑莊就答得冷靜得多，仲話最後一日唔想喺立法會過咁慘，都揀唔落手同邊個過，寧願唔答。