民建聯招新鮮人 重慶杭州實習

【明報專訊】民建聯吸納新鮮人嘅實習計劃愈搞愈大，今年嘅內地實習計劃，招募咗約70名大專生參加，參加者分兩批，其中部分人下星期就去重慶，另一批下個月去杭州。民記聯繫咗當地銀行、博物館、金融、工程等唔同行業嘅單位，安排實習職位畀港生，實習期大約1個月。


青委會資助 民記搵位

青年民建聯主席顏汶羽就話，內地實習生計劃獲青年事務委員會資助，由民記去幫手搵職位。顏汶羽10年前都係透過民記實習生計劃加入政黨，咁民記又會唔會乘機透過內地實習計劃吸納新鮮人？顏汶羽就話，如果學生認同民建聯理念，當然歡迎佢哋入黨啦。