局長覆飛行里數 高永文從未申領

【明報專訊】本報噚日報道特首及大部分問責官員卸任時點處理任內賺取嘅飛行里數，餘下4名局長陸續都回覆咗Emily。食物及衛生局長高永文原來上任至今，都無就公幹旅程申領飛行里數獎賞；而民政事務局長劉江華、運輸及房屋局長張炳良，同財經事務及庫務局長陳家強都話，任內無將公幹旅程所得嘅飛行里數作私人用途。


政府無規定須申領獎賞

目前政府無規定公務員必須就公幹旅程，向航空公司申領飛行里數獎賞，但如果個別公務員喺公幹旅程中，以個人飛行里數帳戶申領飛行獎賞，就要向有關部門呈報，以便用於日後嘅公幹旅程。問責官員都係採取呢個規定。


其餘3局長：無作私人用途

民政局發言人回覆查詢時話，局長劉江華日後即使離任，都唔會將公幹旅程所得嘅飛行里數作私人用途。運房局發言人回覆話，局長張炳良有呈報申領嘅飛行里數，而所有因公幹旅程申領嘅飛行里數，會全數畀局方使用，或者捐作慈善用途。財庫局發言人回覆指局長陳家強會喺離任前，將公幹所得嘅飛行里數全數用喺該局。