Uber發公開信打民意牌 盼與新政府探討雙贏方案

【明報專訊】電召車服務程式Uber進軍香港3年，警方上周二派員「放蛇」再次執法，拘捕22名Uber司機，懷疑佢哋非法載客取酬。Uber噚日開始展開宣傳攻勢「反擊」，包括喺報章頭版落廣告，並呼籲市民到Uber官方網頁，分享乘搭Uber嘅經歷同支持Uber嘅原因。


指警執法後司機減接單

Uber香港區總經理佘雋知（Kenneth，圖）噚日亦都向乘客同司機發出公開信，主題叫做「選擇Uber，讓我們繼續服務香港」。Emily噚日同Kenneth傾開，佢話自從警方上星期再次執法後，的確令Uber司機減少接單，亦都令車程收費貴咗，但就話有唔少市民繼續支持，未來幾日Uber會繼續喺社交媒體同報紙宣傳，希望進一步爭取大家嘅支持。


稱不願放棄港市場

Kenneth表明，Uber唔希望放棄香港市場，目前香港已經大約有100萬人下載Uber程式，而且內地同新加坡政府近年亦都已經將Uber合化法，相信香港亦都一定能夠做得到，但需政府支持。佢話期望新一屆政府喺7月1號上任後，Uber可以繼續同政府有正面嘅溝通，探討雙贏方案。


至於上次警方拘捕嘅22個司機，Kenneth話Uber正為每個司機提供法律意見，包括提供有關第三者保險嘅證明畀警方。警方發言人就回覆話，目前嗰22個司機正保釋候查，6月下旬要再到警署報到。