獄中學包糉 更生青年變「師傅」

【明報專訊】噚日端午節大家食咗幾多隻糉呢？人手包糉已經買少見少，想像到一個23歲嘅後生仔係一名包糉嘅「師傅仔」嗎？阿偉（化名）15歲時曾入獄7個月，佢把握喺獄中嘅時間報讀糉子製作班，出獄後佢輾轉到社企「明朗廚房」工作，重拾包糉手藝，更變得自信、有責任感。


一雙巧手，將糉葉摺成漏斗狀，再倒糯米、放餡料，一隻應節糉子便成形。阿偉15歲時犯罪被判入懲教院所，回想牢獄生活，佢形容十分苦悶，只期待每周一次嘅糉子製作班。「我見好多師兄都成功包到，無理由自己做唔到」，學習包糉唔容易，經歷30多次嘗試，阿偉人生第一隻「見得吓人」嘅糉先出爐。


離開院所後，礙於釋囚身分，阿偉覺得不獲外界信任，一度迷失方向，更放棄日本餐廳嘅工作。其後善導會聯絡阿偉，見佢曾學過包糉，一年前遂建議佢到旗下社企「明朗廚房」工作。