修訂政策 浸大考試唔計出席率

【明報專訊】浸會大學教務議會通過修訂學生課堂出席率政策，由2017至2018學年起，唔再會因為學生出席率少過七成，就唔畀學生出席嗰科考試。浸大學生輔導長鄧裕南同Emily講，有咁樣嘅修訂，係因為覺得大學生應有自由選擇權，強調雖然修改咗要求，但仍期望學生上足堂，希望大學生自律，知道學習嘅重要。


浸大學生會長劉子頎就話，出席率爭議係源於一直以來浸大嘅兩星期增/退選期（add-drop period）都計出席率，令比較遲增選嘅同學有問題。教務議會傾咗好耐點改善，最後決定不如直接唔計出席率，相信學生會負番上堂嘅責任。


劉同學同Emily講，有時同學上堂時間有緊要嘢做，又或請病假，於是要同教授解釋原因，都好麻煩。佢覺得大學生其實有能力選擇上堂時間用嚟做乜嘢，認為新安排令同學「似番個大學生」，對學習反而仲有好處。