探飛行服務隊 葛珮帆讚女機師夠英

【明報專訊】民建聯立法會議員葛珮帆不時到訪唔同嘅紀律部隊，仲會喺facebook直播。Emily噚日見佢直擊政府飛行服務隊基地，同一班女機師喺美洲豹直升機上傾偈，見佢著埋制服，成個紀律部隊model咁，佢就話邊及得啲女機師咁英！


「全能機長」要訓練8至10年

飛行服務隊共有42個機師，當中有5名女將，噚日有3名女機師同葛珮帆傾偈。其中Queena加入飛行服務隊約兩年，佢大學本科同飛行無關，但因為自細一直有個夢想，「想好似雀仔飛來飛去」，所以大學畢業後決定投考。另一女機師Emily就話，飛行服務隊機師要先去外國接受14個月嘅初期訓練，再按佢哋駕駛嘅機種，花8至10年訓練，先可以成為「全能機長」。


飛行服務隊今年會招聘4至6個機師，葛珮帆話招聘要求嚴格，體能要求高，仲要做關於數理、性格同領導能力嘅測試等，又話噚日天氣咁熱，自己熱到全身濕晒，但班機師一滴汗都無，證明佢哋真係訓練有素。