fb六四相框獲批 逾千人用 網民笑稱馮家強「成功爭取」

【明報專訊】星期日就係六四28周年，教協總幹事馮家強前日話，本來整好咗「平反六四 結束專政」相框，打算畀市民喺facebook作帳戶頭像用，但fb拒絕批准使用呢個相框，話相框「帶有貶低、威脅、或攻擊特定對象、法人、民族或團體的內容」。事件經傳媒廣泛報道後，有關相框噚日早上突然獲fb批准使用，fb亦就事件致歉。


fb致歉：錯誤拒批該相框

Emily同事噚日向facebook了解事件，發言人話，錯誤地拒絕咗該特效相框，為此致歉，並已通知該用戶其特效相框已獲批准。


六四相框「解禁」後，唔少民主派及社運界人士響應，馮家強話截至噚晚10點半，有逾1500人喺fb轉咗頭像。Emily發現，唔少人用自己張相拼入六四相框，而資訊科技界議員莫乃光就用咗中大民主女神相片代替。支聯會秘書李卓人都轉咗六四相框，主席何俊仁至噚晚無轉頭像，反而轉載社運人士曾健超轉相框嘅帖文。


民主黨主席胡志偉噚晚亦無轉相框，但佢喺「封面相片」用咗六四燭光晚會相片，附上周日六四晚會資料呼籲市民參加。


馮家強嘅fb頭像噚日忽然可以顯示出「平反六四」相框，佢亦隨即發帖話「原本不獲facebook批准的frame今天一早可以用了」，指另一個「毋忘六四」嘅相框就仍然審查中，「快45小時」。有網民獲知消息後笑言馮家強係咪「成功爭取」。