讚劉小麗陳淑莊靚女令妻「黑面」 邵家輝講骨灰龕變講「婚外情」

【明報專訊】立法會噚日三讀通過《私營骨灰安置所條例草案》，審議嗰陣議員爭論有關將同性伴侶視為親屬、擁有申領亡者骨灰權利嘅修正案。不過自由黨邵家輝（Peter）發言時，一度扯開話題講婚外情，話自己曾經喺老婆面前讚劉小麗同公民黨陳淑莊呢兩個女同事「其實都幾靚」，太太即刻「黑面」，擔心佢喺立法會有「辦公室婚外情」喎。呢番話引起部分民主派嘩然，連在席嘅食衛局長高永文都皺晒眉。


Peter強調尊重同性戀者，但批評修正案隱藏咗同意同性婚姻喺香港嘅地位，之後佢突然引用最新嘅愛滋病數據，立法會主席梁君彥即刻勸止，反問相關數據同草案有咩關係，「我哋家係講骨灰龕安置所條例，請你返番嚟呢度好嗎？」高永文聽到Peter發言，都忍唔住搖搖頭。


經過主席提醒，Peter繼續發言，但係就另開新議題，引述劉小麗曾經質疑建制派如果咁尊重一夫一妻，其實更加唔應該容許婚外情，Peter跟住就爆出「辦公室婚外情」論。去到發言尾聲，Peter重申所有事都「有底線」，話中國人有好多倫理，自己唔同意「包容變鼓吹」喎。