梁美芬赴京研討會 講「不容公投自決」

【明報專訊】全國人大常委會聽日會喺北京人民大會堂，舉辦紀念香港回歸同《基本法》實施20周年嘅座談會，身兼港澳協調小組組長嘅人大委員長張德江將發表講話。獲邀赴京出席座談會嘅經民聯副主席梁美芬（Priscilla），預料領導人會總結一國兩制同基本法落實情况，仲會表達期望，相信對方「有鼓勵、有提示」，至於Priscilla亦會喺研討會發言，佢已經準備好長約12分鐘講稿，題為「一國兩制不容許公投自決」。


北京呢邊廂舉辦官方座談會，另邊廂香港民間亦有唔少學術會議講回歸。過百名學者、政界人士同市民噚日喺教育大學出席「香港特別行政區回歸20周年學術會議」，回顧香港過去20年嘅政治、社會同法律發展，同時展望將來。教大請咗立法會前主席曾鈺成、民主黨楊森同公民黨陳家洛等發言，副校長呂大樂話，希望會議可以為香港面對嘅機遇同挑戰，搵到應對方案。


教大下月研討會「陣容鼎盛」

教大喺6月底仲會有一連兩日嘅研討會，請到多名本地知名學者演講，包括基本法委員會委員陳弘毅、佔中發起人陳健民、中大馬嶽同港大鍾庭耀等，有份籌備活動嘅教大學者方志恒日前就喺facebook形容，呢個陣容係「有今生無來世」。