距落任個幾月 外訪繼續停不了 吳克儉又打算緬甸考察

【明報專訊】日前一連5日飛咗去英國出席國際教育論壇嘅教育局長吳克儉，噚晚終於返港，雖然距離落任剩番個幾月，但Emily聽聞局長嚟緊仲會馬不停蹄外訪，除咗去內地，仲考慮緊去緬甸考察喎。


4年幾外訪用咗300萬

吳克儉嘅外遊次數一直備受關注，根據立法會文件，吳局長喺上一個財政年度共外訪17次，係上任以嚟新高，舊年10月去秘魯同美國嗰次連埋隨行官員共3人用咗成40.5萬蚊，成年一共用咗近70萬蚊，4年幾用咗大約300萬蚊。


吳局長剩返仲有個幾月落任，當然要把握最後機會外訪，聞說會去北京同大學校長交流，又想響應大灣區發展去考察一下，Emily聽聞教育局考慮安排緊緬甸外訪，唔知緬甸教育制度有咩嘢值得香港參考喇。


Emily又聽聞，吳克儉覺得每次外訪都好有用，例如用咗最多錢嗰次去秘魯，係出席亞太經合組織（APEC）教育部長會議；之前佢去過印尼，咁印尼係東盟最大嘅經濟體，去打好關係，咁都幫到香港學生第日去嗰度發展嘅。


吳克儉早排表明唔會留任，而新局長應該另有其人，佢遲下就要離開政總，而Emily聽聞，局中有意幫佢搞個內部歡送會，但有啲官員暫時反應一般，未知搞唔搞得成。