劉鳴煒重選董事遭78萬股反對

【明報專訊】華置（0127）噚日搞股東周年大會，決議案投票都係例牌嗰啲啦！表決通過業績報告、末期股息、重選董事等……喺重選董事方面，華置股東分別要表決重選「甘比」陳凱韻、甘比家姐陳詩韻、「大劉」劉鑾雄個仔劉鳴煒等共5個管理層再做董事。睇番投票結果，4個董事都獲股東100%贊成票，唯獨劉鳴煒有成78萬股反對。


另外4董事100%贊成票

其實，劉鳴煒喺2006年已經係集團董事，2014年仲做埋董事會主席，入咗公司成11年啦，加上一副大好青年外表，咁好嘅package，冇理由會有人反對㗎？不過，對比起其餘5名董事，劉鳴煒近年似乎真係擺得唔多時間喺公司，反而好似全心全意要從政咁，就算今年先做執董嘅甘比，2002年都已經幫公司打理『雙妹嚜』化妝品牌。睇嚟淨係package好係冇用，劉鳴煒成日no show，股東們想留番個印象嘅機會都無。


[小琴密語]