律師會選理事前夕 何君堯告任建峰誹謗

【明報專訊】律師會聽日會舉行周年大會，選出5名理事會成員，有份競逐理事會成員嘅立法會議員何君堯，就喺選舉前入稟高等法院，控告「法政匯思」成員任建峰誹謗。任建峰早前寫過一篇〈一票不投何君堯〉文章，呼籲會員唔好投票畀何君堯。


任建峰噚日喺facebook透露已收到法院文件，顯示何君堯正式入稟控告佢誹謗，要求賠償。任話「對於就公眾紀錄上記載的事情發表意見，而被一名公眾人物控告，感到詫異與失望」，亦強調何君堯嘅舉動「不會令我停止向律師會會員呼籲不要投票給他」，指自己會繼續支持曾經公開推薦嘅候選人。任建峰講明會堅定地作出抗辯。


何君堯噚日喺立法會回應入稟一事，佢話任建峰嘅文章絕對影響到律師會理事會成員選舉，指文章立論同事實不符，「攻擊我選舉，用意惡意」。何又質疑任建峰係借勢將律師會選舉「政治化」，以及「令我失去會員支持」。


今次律師會改選5名理事，一共有8人報名競逐。任建峰嘅文章早前刊登後，何君堯已經喺facebook反擊，要求任收回言論及道歉。