因鬧得福 梁繼昌fb擁躉增半

【明報專訊】立法會成立專責委員會調查特首梁振英（CY）收受澳洲企業UGL 400萬鎊事件，而CY近日就被指將焦點轉移，連日對委員之一嘅會計界議員梁繼昌（Kenneth）口誅筆伐。Kenneth因被鬧而幾乎日日見報之餘，同時亦獲得唔少支持，佢嘅facebook專頁，一周前本來只有約2400個「Like」，但家已經升至約3600個，即係多咗一半。


CY鬧一鬧，即多咗五成人留意Kenneth嘅動態，聞說Kenneth上載一啲較悶嘅文章或新聞連結，都多咗人睇及畀「Like」，恍如變成KOL（Key Opinion Leader）咁。CY鬧Kenneth，近日親建制報章都形容Kenneth係「網紅」，有報章及親CY嘅網媒仲好「關心」佢，例如佢最近換咗新車都見報，而呢啲網媒近日不斷出post，話CY點樣「秒殺」Kenneth，並翻炒舊聞，話以前有雜誌報道Kenneth嘅情史，唔知係咪驚大家唔知邊個係梁繼昌呢。