曾老師登珠峰：早知影多幾張相

【明報專訊】三度攀珠峰嘅中學教師曾燕紅周日成功登頂，曾老師話過攀珠峰「冇特別」，但噚晚Emily取得佢喺珠峰頂影嘅相，就覺得8848.44米上嘅景色真係好靚，「早知影多幾張、望多幾眼先落番嚟！真係唔會再上第二次㗎喇」。另外，曾老師會喺星期日返港。


曾老師話，珠峰頂非常凍，凍到普通手機、相機嘅電池都死晒，影唔到相，好彩有人有專用相機先影到幾張相，留個倩影。佢話當時好多人登頂，要輪住影相，加上當時心中千萬樣擔心，一心只想安全下山，所以就「求其影幾張」，景色都未睇飽就落山喇。


安全落山 周日返港

曾老師已經返咗去尼泊爾首都加德滿都，佢噚晚從朋友度拎番啲相睇先勾番起登頂感受，本身好似「冇特別」嘅風景，睇相先記得山頂上嘅風景好靚，「我一路睇，一路話『嘩，真係好靚呀』，好後悔嗰陣點解唔影多幾張相、望多陣景色，因為真係冇第二次㗎喇！」

曾老師又話，噚日早上起身時覺得個頭好脹，到噚晚好番啲，佢解釋，因為身體習慣咗海拔7000幾米環境，落到海平面陸地高度會有啲唔習慣，相信兩三日後就會冇事。曾老師預計周日早上就會凱旋。


另外，同日登頂嘅物理治療師吳俊霆今晨抵港，會喺機場有個小型祝捷會。佢喺facebook講過登頂時遇上小意外，但賣關子，返港後先交代發生咩事。