陳太搞論壇 傾傾2047會點樣

【明報專訊】今年係回歸20周年，公民實踐培育基金將會舉行《2047：香港何去何從？》論壇，開展香港2047年後前途問題嘅正式討論。基金董事、前政務司長陳方安生話，本來一國兩制、高度自治實踐得好，市民係唔會特別關注2047問題，可惜家一國兩制變質，令大家都好關注呢個議題。
論壇將會喺下個月17號舉行，邀請咗立法會前主席曾鈺成、前基本法起草委員李柱銘、立法會前議員吳靄儀、香港眾志立法會議員羅冠聰，以及電影《十年》導演之一伍嘉良出席。基金另一董事、大律師吳思諾話，論壇嘅演講嘉賓嚟自唔同背景同年齡層，非常多元，相信可以就香港過去、未來提出唔同見解。
每當社會講起2047議題，都會有部分青年提出要求香港獨立，點解今次論壇無請港獨人士？陳太話，相信屆時演講嘉賓都會回應港獨問題、分析港獨係咪可行。