CY捧饒宗頤敦煌展場 講一帶一路

【明報專訊】為慶祝香港回歸20年，大師級嘅文化藝術展覽一場接一場，今日就輪到「敦煌韻致——饒宗頤教授之敦煌學術藝術展」正式喺香港文化博物館開幕。展覽噚日舉行開幕禮，已過百歲嘅饒宗頤教授、特首梁振英（CY）及梁太唐青儀、民政事務局長劉江華都有出席。CY喺致辭時，將今次敦煌展與上個禮拜出席北京「一帶一路」高峰論壇拉上關係，指敦煌作為絲綢之路嘅耀眼明珠，吸引唔少世界目光。
國學大師饒宗頤早於1950年代已經研究敦煌出土文物，又曾赴巴黎同倫敦研究敦煌畫稿和寫卷，對發揚敦煌學作出巨大貢獻。今次展覽會展出115組饒教授嘅敦煌學著作，及以此為創作靈感嘅書畫展品，例如《散花飛天》、《佛手獻花》、《樹下觀音》等。展覽於今日至9月18日舉行，讀者若對敦煌文化有興趣，就千祈唔好錯過喇。