市民投訴馬路踩車畀大車「壓線」 陸恭蕙認政府單車政策唔掂

【明報專訊】單車係零排放嘅代步工具，但政府一向唔鼓勵市民喺市區踩單車，立法會環境事務委員噚日開會討論路邊空氣污染問題，唔少議員都批評政府嘅交通政策對單車並不友善，配套又不足。公民黨郭榮鏗就話收到唔少市民投訴，話喺馬路踩單車都試過畀大型車輛「壓線」嘅經驗，要求環境局聯同運房局，跨部門研究點樣推廣使用單車作為環保交通工具。


話駕駛者反指踩車者自覺大晒

唔知係咪政府就嚟換屆，副環境局長陸恭蕙（Christine）突然放下官帽，發表個人意見，承認政府喺推動單車政策上唔夠力，而佢自己就對推廣單車作為綠色運輸好有興趣，又話如果運輸及房屋局願意配合，相信可以成事，佢又舉例丹麥國策以單車行先，做到汽車讓單車。


不過，Christine亦回應郭榮鏗，話自己收到唔少駕車人士投訴，話踩單車嘅人覺得自己大晒，要私家車讓番轉頭，所以佢話要喺香港市區做到人、車、單車分流並唔容易，呢個亦係令運輸署最頭痛嘅問題。


Christine又話，議員有提議應向新一屆政府提出，因為現屆政府就快換屆，但就無透露自己去向。