工聯會單張擅用草日漫畫 梁子穎：請原諒本會愚昧

【明報專訊】工聯會立法會議員麥美娟、葵青區區議員梁子穎早前喺屋邨貼單張，宣傳安蔭婦女會招收會員，單張上用咗草日漫畫《梁家婦女》嘅插圖，漫畫家草日（梁仲基）噚日下午就喺facebook發聲明，話明無授權佢哋採用，請涉事者尊重知識產權。梁子穎亦喺facebook上道歉，請草日「原諒本會愚昧」。
《梁家婦女》宣傳安蔭婦女會
安蔭婦女會嘅宣傳單張上用咗兩幅《梁家婦女》嘅插圖，仲有一個標題寫住「梁家婦女—招收會員」。草日噚日下午就喺facebook專頁上發聲明表達不滿，話《梁家婦女》係佢嘅創作，同安蔭婦女會無任何直接、間接關係，又話對於佢哋採用作品並唔知情。
涉事嘅區議員梁子穎好快就喺草日facebook留言道歉，話已經聯絡咗草日，承諾會喺噚日內清除所有單張，同埋會喺當眼處發聲明道歉，表明漫畫係草日嘅作品。不過網民似乎就唔係好收貨，梁子穎嘅道歉留言喺兩個鐘內吸咗超過160個嬲嬲，網民仲要求佢賠償(口添)。