稱識用八達通 林鄭：係閘機設計問題

【明報專訊】候任特首林鄭月娥競選期間搭完港鐵拍卡後「唔識出閘」成為熱話，港台噚日播出佢嘅錄音訪問，林太就再次澄清唔係唔識出閘，仲話要向港鐵主席馬時亨反映有關問題。


港台《舊日的足跡》噚日播出林太訪問，林太話自己生活好樸實同平民，好多時會自己揸車去買嘢同去教堂。被問到現時有無機會再用八達通，林太話當日事件唔係八達通問題，而係港鐵閘機設計問題。


話唔記得舊閘機要推

佢話當時去試乘新起嘅南港島線，拍卡後閘機會自動打開，但去到金鐘站離開時，唔少記者都影住，佢就唔記得舊式閘機需要自己推開軸，以為拍完卡就行得，形容閘機有唔同設計，自己係受到新閘機嘅影像影響。


老公投訴一回家就瞓

林太喺節目上亦有談及家事，佢自言返到屋企係「小女人」，因為佢老公、囝囝都好叻，強調自己絕對唔會將返工嘅風格帶返屋企，又透露近日太忙，丈夫林兆波都有投訴佢一返屋企就瞓覺喎。


主持人問到林太係咪好遲先拍拖、結婚，林太話覺得讀書時唔應該談戀愛，但就強調「當時梗係有人追」，但佢自己就表明要讀完書、畢業先，所以無開放自己，約佢飲餐茶都唔會去。佢形容自己離開校園翌年就識到男朋友、今日嘅丈夫，所以唔算遲喎。林太又話佢當年係先擺酒後註冊，結婚紀念日就係《中英聯合聲明》簽署當日，所以好難唔記得喎。